Business

30,000 കോര്‍പ്പറേറ്റ് ജോലികള്‍ വെട്ടിക്കുറയ്ക്കാനൊരുങ്ങി ആമസോണ്‍. ചൊവ്വാഴ്ച മുതല്‍ ഇതുമായി ബന്ധപ്പെട്ട ഇമെയിലുകള്‍ ഉദ്യോഗസ്ഥര്‍ക്ക് ലഭിച്ചുതുടങ്ങും. ആമസോണിലെ ആകെ ജീവനക്കാരുടെ എണ്ണം 1.55 ദശലക്ഷമാണ്. ഇതിന്റെ ചെറിയൊരു ശതാമാനമാണെങ്കിലും, ആകെയുള്ള കോര്‍പ്പറേറ്റ് തെഴിലാളികളുടെ പത്ത് ശതമാനം തൊഴിലാളികളെ ഇത് ബാധിക്കും. കൊറോണക്കാലത്ത് ഉണ്ടായ ആവശ്യത്തെത്തുടര്‍ന്ന് നടത്തിയ അധിക നിയമനങ്ങള്‍ കുറയ്ക്കാനും ചെലവ് ചുരുക്കുന്നതിന്റെയും ഭാഗമായിട്ടാണ് ഈ തീരുമാനം. 2022-ന്റെ അവസാനത്തില്‍ ഏകദേശം 27,000 തസ്തികകള്‍ ഒഴിവാക്കിയതിനുശേഷം ആമസോണില്‍ നടക്കുന്ന ഏറ്റവും കൂടിയ തൊഴില്‍ വെട്ടിക്കുറയ്ക്കല്‍ ആയിരിക്കും ഇത്.

ടാറ്റ മോട്ടോഴ്സ് ഇനി മുതൽ‌ രണ്ട് കമ്പനികൾ. കാറുകളുടെ നിർമാണത്തിന് ടാറ്റ മോട്ടോഴ്സ് പാസഞ്ചർ വെഹിക്കിൾ ലിമിറ്റഡ്, വാണിജ്യാവശ്യത്തിനുള്ള വാഹനങ്ങളുടെ നിർമാണത്തിന് ടിഎംഎൽ കൊമേഴ്സ്യൽ വെഹിക്കിൾ ലിമിറ്റഡ് എന്നിങ്ങനെയാണ് രണ്ട് കമ്പനികളായത്. കാറുകൾ, ജാഗ്വാർ ലാൻഡ് റോവർ എന്നിവയുടെ നിർമാണവും വിപണനവുമാണ് ടാറ്റ മോട്ടോഴ്സ് പാസഞ്ചർ വെഹിക്കിൾ ലിമിറ്റഡ് നിർവഹിക്കുക. ട്രക്കുകൾ, ടിപ്പറുകൾ, ബസുകൾ എന്നിവയുടെ നിർമാണവും വിപണനവുമാണ് ടിഎംഎൽ കൊമേഴ്സ്യൽ വെഹിക്കിൾ ലിമിറ്റഡ് നടത്തുക. ടിഎംഎൽ ഒരു ലിസ്റ്റഡ് സ്ഥാപനമായി തുടരും.